सीमापार जोगबनी बजार धाउने नेपाली उपभोक्ता रोक्न विराटनगरमा भव्य दसैँ सस्तो बजार

२१ असाेज । दसैँमा किनमेलका लागि भारतको जाेगबनी जाने उपभाेक्तालाई राेक्न भन्दै विराटनगरमा ‘विराट ट्रेड फेयर’ आयोजना गरिने भएकाे छ ।

दसैँ–तिहारमा सीमावर्ती बजार जोगबनी जाने उपभोक्ता विराटनगरमै रोक्न असोज २२ देखि ३० गतेसम्म विराट वाणिज्य कारोबार संघले दोस्रो संस्करणको ‘विराट ट्रेड फेयर’ आयोजना गर्ने भएको हो ।
विराटनगरकाे जैन भवनमा हुने ट्रेड फेयरमा १३० वटा स्टल रहनेछन् ।

वाणिज्य कारोबार मेलामा सर्वसाधारणलाई सुपथ मूल्यमा उपभोग्य सामग्री उपलब्ध गराउने विराट वाणिज्य कारोबार संघका अध्यक्ष प्रमोद जिन्दलले जानकारी गराए । उनका अनुसार मेलाले स्थानीय बजारलाई चलायमान बनाउने छ ।

मेलामा खाद्यान्न, लत्ताकपडा, जुत्ताचप्पल, धातुका सामान, विद्युतीय उपकरण, गाडी, फर्निसिङ, गृह उपयोगी सामग्री, कृषि उत्पादन, सूचना प्रविधि र हस्तकलाका सामग्रीका १३० भन्दा बढी स्टलहरू रहनेछन् । ट्रेड फेयर १६ करोड ५० लाख रुपैयाँ बराबरको कारोबार हुने आयोजकको आशा तथा विश्वास छ ।