भिजिट भिसाको आवरणमा दुबई हुँदै श्रीलंका हिँडेका तीन जना त्रिभुवन विमानस्थलबाट नियन्त्रणमा

२३ भदौ । भिजिट भिसामा दुबई हुँदै श्रीलंका जान लागेका तीन जना त्रिभुवन अन्तराष्ट्रिय विमानस्थलमै सुरक्षाकर्मी हिरासतमा परेका छन् ।

नियन्त्रण पर्नेहरुमा सिन्धुलीको कमलामाई नगरपालिका-२ घर भएका १९ वर्षीय सन्जिव भुषाल, रौतहटको कटहरिया नगरपालिका-३ का १९ वर्षीय शेख तबरेज र स्याङ्जाको भीरकोट नगरपालिका–४ का २७ वर्षीय समित रेग्मी छन् ।

उनीहरुलाई काठमाडौं उपत्यका अपराध गहन तहकिकात कार्यालयको टोलीले नियन्त्रण गरेको हो । उनीहरु एअर अरेबियाको जहाजमार्फत दुबई हुँदै श्रीलंका जान लागेका थिए ।

प्रारम्भिक अनुसन्धनका क्रममा उनीहरु भिजिट भिसामा श्रीलंका भनेर वैदेशिक रोजगारीमा कतार जान लागेको पाइएको छ ।

उनीहरुको साथबाट बरामद भएको श्रम स्वीकृत नक्कली रहेको देखिएकाले लिखत सम्बन्धी कसुरमा गहन तहकिकात अघि बढाइएको छ ।