पृथ्वी राजमार्गको कृष्णभिर खण्डमा रोकिएका ग्यास बुलेट तथा ठूला सवारी साधन सञ्चालन गर्न सडक खुलाइँदै

२८ भदौ । पृथ्वी राजमार्गअन्तर्गत धादिङको कृष्णभिरमा अवरुद्ध राजमार्ग आंशिक रूपमा सञ्चालनमा ल्याउन आवश्यक गृहकार्य तीव्र पारिएको छ ।

सडकको ग्रेड मिलाउने काम भइरहेकाले केहीबेरमा खाली ग्यास बुलेट गुडाएर सडकको अवस्था परीक्षण गर्ने गृहकार्य गरिएको हो ।

हालको अवस्थामा धादिङका प्रमुख जिल्ला अधिकारीसहितको टोली कृष्णभिरमा स्थलगत निरीक्षणमा पुगेको छ । राजमार्ग खुलाउन विभिन्न निकाय र संयन्त्र परिचालन गरेर काम भइरहेको छ ।

कृष्णभिरमा सडकको ग्रेड मिलाउने काम तीव्र पारिएको छ । दुईवटा बुलडोजर प्रयोग गरेर राजमार्ग सम्याउने तथा आवागमनका लागि आवश्यक प्लेटफर्म तयार गर्ने काम भइरहेको छ । सडकको ग्राभेलिङ र कम्प्याक्सनको काम भने अझै बाँकी छ ।

यद्यपि तत्कालका लागि अड्किएका ग्यास बुलेट तथा हेभी इक्युपमेन्ट बोकेका सवारीसाधनलाई मात्र आवतजावत गराउन सकिने गरी राजमार्ग तयार पार्ने पहल जारी राखिएको छ ।

आयोजनाका अनुसार मौसमले साथ दिएमा आजै आंशिक रूपमा ग्यास बुलेट र हेभी इक्युपमेन्ट बोकेका सवारीसाधन सञ्चालन गर्न सकिनेछ ।

त्यसअघि खाली ग्यास बुलेट गुडाएर सडकको भारवहन क्षमता र आवागमनको अवस्था परीक्षण गरिनेछ ।

कृष्णभिरमा राजमार्ग चिल्लो र सम्याइएको देखिए पनि पूर्ण रूपमा सञ्चालनयोग्य बनाउन ग्राभेलिङ र कम्प्याक्सनलगायतका काम पूरा गर्नुपर्ने अवस्था छ ।

राजमार्ग खुलाउन हालको अवस्थामा दुईवटा बुलडोजरले एकपछि अर्को गरी काम गरिरहेका छन् । गत भदौ १० गते आएको त्रिशूली बाढीका कारण कृष्णभीरको राजमार्ग कटान हुँदा राजमार्ग अवरुद्ध छ ।