गोरखामा अचानक उर्लियो बाढी : उच्च जोखिममा परेका बस्तीहरूको पछिल्लो अवस्था

२५ असोज । गोरखाको चुमनुम्ब्री गाउँपालिका हुँदै बग्ने बूढीगण्डकी नदीमा लेदो र गेग्रानसहितको आकस्मिक जलप्रलय आएको छ ।

यो बाढीले तल्लो क्षेत्र आरुघाटसम्म क्षति पुर्‍याउन सक्ने आशंका गरिएको छ । त्यसैले तटीय क्षेत्रमा रहेकाहरुलाई सतर्क रहन राष्ट्रिय विपद जोखिम न्यूनीकरण तथा व्यवस्थापन प्राधिकरणले सार्वजनिक गरेको छ ।

प्राधिकरणका कार्यकारी प्रमुख डा. धर्मराज उप्रेतीका अनुसार बाढीले सिर्दिबास, जगत, यारी, तातोपानी, माछीखोला, सोती, आरुखेत, आरुघाटसम्म क्षति पुर्‍याउन सक्ने जोखिम छ । त्यसैले यी क्षेत्रमा रहेका बासिन्दा सतर्क हुनुपर्ने उनले जानकारी गराए ।

मौसम विज्ञान विभागको जलप्रलय पूर्वानुमान महाशाखाबाट पनि तटीय क्षेत्रका बासिन्दालाई एसएमएस पठाइसकिएको छ । महाशाखाका बाढीविज्ञ विनोद पराजुलीका अनुसार जलप्रलय आरुघाटसम्म आइपुग्न करिब तीन घण्टा लाग्ने अनुमान छ । त्यसैले आरुघाटसम्मै सतर्क रहन आग्रह गर्दै एसएमएस पठाइएको उनले जानकारी गराए ।

बाढीले तल्लो तटीय क्षेत्रमा क्षति गर्न सक्ने भन्दै सचेत रहन नेपाल सुरक्षा संयन्त्रले पनि आग्रह गरेको छ ।

गोर्खाको चुमनुम्ब्री गाउँपालिका वडा नम्बर ६ को चुम्चेत क्षेत्रबाट स्थानीय खोला हुँदै जलप्रलय बूढीगण्डकीमा मिसिएको छ । बूढीगण्डकी मनास्लु हिमालको पूर्वी मोहोडा हुँदै बग्ने गरेको छ ।

बाढीको कारण अहिलेसम्म खुलेको छैन । माथिल्लो क्षेत्रमा पानी परेको रेकर्ड छैन । कतै भूस्खलन गएर बहाव रोकिएको र पछि बाँध फुटेर आकस्मिक जलप्रलय आएको हुनसक्ने प्रारम्भिक अनुमान गरिएको विपद् प्राधिकरणले सार्वजनिक गरेको छ ।

यो पनि पढ्नुहोस

चुमनुब्रीका प्रशासकीय अधिकृत भन्छन्- त्राहि-त्राहि छ, बाढी रोकिने र आउने गरेको छ

यो पनि पढ्नुहोस

चुमनुब्रीकी उपाध्यक्ष गुरुङ भन्छिन्- भोटेकोशीको झल्को दिनेगरी बाढी आएको छ