बूढीगण्डकी नदीमा पानीको बहाव उच्च : तटीय क्षेत्रका बस्तीहरूलाई सतर्क रहन प्रशासनको अपिल

२५ असोज । गोरखाको चुमनुब्री गाउँपालिका हुँदै बग्ने बूढीगण्डकी नदीमा लेदो र गेग्रानसहितको आकस्मिक जलप्रलय आएको छ ।

बाढीका कारण तल्लो तटीय क्षेत्रमा क्षति गर्न सक्ने भन्दै सचेत रहन नेपाल सुरक्षा संयन्त्रले आग्रह गरेको छ ।

बुढी गण्डकी नदीको चुम्नुब्री गाउँपालिका-६ बाट ठूलोबाढी आइरहेकोले जलप्रलय पास नहुँदासम्म त्रिशूली दोभानसम्म नदी छेउछाउ नजान र उच्च स्थानमा सुरक्षित बस्न नेपाल सुरक्षा संयन्त्रले अनुरोध गरेको छ ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणले पनि नदी तटीय क्षेत्रमा रहेकाहरूलाई सतर्क रहन भनेको छ ।