सरकारी पहलपछि पूर्वी नेपालका दुग्ध उत्पादक किसानको लामो बक्यौता रकम ३ करोडमा झर्यो

विराटनगर दुग्ध वितरण आयोजनाले पूर्वी क्षेत्रका दुध कृषकहरूलाई तिर्नुपर्ने बक्यौता रकम घटेर करिब ३ करोड रुपैयाँ मात्र बाँकी रहेको सार्वजनिक गरेको छ ।

कुनै समय करिब ३५ करोड रुपैयाँसम्म कृषकको दुधको बक्यौता रहेकामा दुध तथा दुधजन्य पदार्थको बिक्री बढ्दै गएपछि बक्यौता रकम घटेकोे विराटनगर दुग्ध वितरण आयोजनाले सार्वजनिक गरेको छ ।

१५/१५ दिनमा दुध कृषकहरूलाई किस्ता रकम बुझाउँदै आएको विराटनगर दुग्ध वितरण आयोजनाले हालको अवस्थामा साउन र भाद्र महिनाको किस्ताको रकम तिर्नुपर्ने स्थिति रहेको र बाकी रनिङ बील मात्र बाँकी रहेको निमित्त आयोजना प्रमुख नविन किशोर शर्माले जानकारी उपलब्ध गराए । उनले हालको अवस्थामा दुध तथा दुग्धजन्य पदार्थको विक्री ५० प्रतिशत सम्म बढेको र घिउको मौज्दात ५ मेट्रिक टन मात्र रहेको जानकारी गराए ।

पूर्वका कृषकहरूबाट दैनिक करिब १० हजार ५ सय लिटर दुध संकलन गरिरहेको र करिब ५ हजार लिटर बराबरको दुध र दुग्धजन्य पदार्थ बिक्री गरिरहेको विराटनगर दुग्ध वितरण आयोजनाले सार्वजनिक गरेको छ ।

कात्तिक महिनादेखि दुध संकलन बढेर दैनिक करिब १५ हजार लिटरसम्म पुग्ने र दैनिक खपत हुने दुध तथा दुधजन्य पदार्थ बाहेकको करिब १० हजार लिटर दुधको पाउडर दुध बनाउने गृहकार्य रहेको विराटनगर दुग्ध वितरण आयोजनाले जानकारी दिएको छ ।