नेपाली कांग्रेसले केन्द्रीय कार्यसमितिको अद्यावधिक नामावली निर्वाचन आयोगमा बुझायो

नेपाली कांग्रेस १५औं महाधिवेशनबाट निर्वाचित केन्द्रीय कार्यसमितिको विवरण अद्यावधिकका लागि निर्वाचन आयोग गएको छ ।

मंसिर अन्तिम साता समापन महाधिवेशनबाट निर्वाचन केन्द्रीय कार्यसमितिको विवरण अद्यावधिकका लागि महामन्त्री प्रदीप पौडेलसहितको टोली सोमबार निर्वाचन आयोग गएको हो ।

महामन्त्री पौडेलले आयोगका सचिव कृष्णप्रसाद काप्रीलाई राजनीतिक दल सम्बन्धी ऐनको दफा ५१ अनुसार केन्द्रीय कार्यसमितिको विवरण  बुझाएका छन् ।

उक्त विवरणसँगै पार्टीको विधान संशोधनसम्बन्धी विवरण, महाधिवेशनबाट पारित समसामयिक राजनीतिक दस्तावेज र महाधिवेशनको फैसला पनि बुझाइएको छ ।

गत बिहीबार शपथ ग्रहण समारोहपछि बसेको केन्द्रीय कार्यसमिति उच्चस्तरीय परामर्शले महाधिवेशनबाट निर्वाचित केन्द्रीय कार्यसमितिको विवरण अद्यावधिकको जिम्मा कार्यवाहक मुख्य सचिव दुलाललाई दिएको थियो ।