सवारी चालक अनुमतिपत्र अब स्थानीय पालिकाबाटै वितरण, सप्तरीका सेवाग्राहीलाई सहज

यातायात व्यवस्था कार्यालय राजविराजले सेवाग्राहीलाई सहज रूपमा सवारी चालक अनुमतिपत्र (लाइसेन्स) उपलब्ध गराउन पालिकामार्फत वितरण अभियान आरम्भ गरेको छ ।

‎‎लाइसेन्स छापिएपछि लिनकै लागि यातायात कार्यालय धाउनुपर्ने बाध्यता अन्त्य गर्ने उद्देश्यले कार्यालयले पालिकामार्फत वितरण थालनी गरेको हो ।

‎कार्यालयका अनुसार हाल बोदेबरसाईन नगरपालिका, बलान बिहुल गाउँपालिका र सुरुङ्गा नगरपालिकाबाट सेवा थालनी गरिएको छ । केही दिनभित्रै जिल्लाका सबै पालिकालाई एकमुष्ट रूपमा लाइसेन्स प्रत्यायोजन गर्ने आवश्यक गृहकार्य तीव्र पारिएको छ ।

‎‎बलान बिहुल गाउँपालिकाका अध्यक्ष खेमचन्द्र यादवले कार्यालयको यस कार्यले सेवाग्राहीलाई सहजता प्रदान गर्नुका साथै सकारात्मक सन्देश दिएको जानकारी गराए । ‎

‎यातायात व्यवस्था कार्यालय राजविराजका प्रमुख शशीप्रसाद यादवले पालिकालाई लाइसेन्स प्रत्यायोजन गरेपछि स्थानीय तहले सेवाग्राहीको घरघरमै पुगेर वितरण गर्न सक्ने जानकारी गराए ।

‘‎लाइसेन्स नवीकरण नै अनलाइनबाट गर्न मिल्ने भएपछि सेवाग्राहीलाई थप सहजता होस् भनेर प्रिन्ट भएर आएका लाइसेन्ससमेत पालिकामै पुर्‍याउन थालेका छौँ,’ कार्यालय प्रमुख यादवले जानकारी गराए ।

‎‎बोदेबरसाईन नगरपालिका–१० का उमेश कुमार यादवले पालिकाबाटै लाइसेन्स प्राप्त गर्न पाउँदा खुसी लागेको जानकारी गराए ।

‎सुरुङ्गा नगरपालिकाका प्रमुख गीता चौधरीले तयार भइसकेको लाइसेन्स पालिकाबाटै उपलब्ध हुँदा सेवाग्राहीको समय र खर्च दुवै बचत हुने बताइन् ।