हेमन्त र आरिफ चम्किँदा जर्सीमाथि नेपालको विजय बीच भुर्तेल

ओपनर कुशल भुर्तेलको शतक तथा हेमन्त धामी र आरिफ शेखको शानदार बलिङ मद्दतमा नेपालले जर्सीविरुद्धको पहिलो अभ्यास एकदिवसीय खेलमा विजय हासिल गरेको छ ।

सोमबार राति ग्रानिभलमा समापन खेलमा नेपालले जर्सीमाथि ८१ रनको विजय हासिल गरेको हो । ब्याटिङमा भुर्तेलले शतक बनाए भने बलिङमा हेमन्त धामीले ४ अनि आरिफले ३ विकेट लिँदै जर्सीलाई धराशायी बनाएका थिए ।

नेपालले दिएको २५१ रनको लक्ष्य पछ्याएको जर्सी ४१ ओभरमा १६९ रनमा अलआउट भयो । चार्ली ब्रेनन ८२ रनमा अविजित रहेपनि विजय दिलाउन सकेनन् । डानियल बिरेलले ४१ रन बनाए ।

नेपालका लागि हेमन्तले ७ ओभरमा ३७ रन दिएर ४ विकेट लिए भने आरिफले ५ ओभरमा ९ रन दिएर ३ विकेट लिए । करण केसीले २ तथा सन्दीप लामिछानेले १ विकेट लिए ।

जर्सी १२औं ओभरमा ३९-५ अनि २०औं ओभरमा ५९-८ को अवस्थामा पुगेको थियो र ब्रेनन र बिरेल मिलेर ९४ रनको साझेदारी गरेका थिए । यद्यपी नेपालले साझेदारी तोड्न सफल भयो ।

त्यसअघि टस हारेर पहिले ब्याटिङको निम्तो पाएको नेपालले ५० ओभरमा ८ विकेट गुमाएर २५० रन बनाएको थियो ।

यसभन्दा अघिल्लो चरणमा ३१औं ओभर चलिरहँदा नेपाल १५८-२ को अवस्थामा रहँदा वर्षा भएपछि करिब डेढ घण्टा खेल रोकिएको थियो । खेल पुन: थालनी हुँदा ओभर घटाइएको थिएन ।

भुर्तेल ११७ बलमा १०५ रन बनाएर आउट भए । उनले १३ चौका प्रहार गरे । यसबाहेक भीम सार्कीले ३९ रन बनाए ।

एक समय २९औं ओभरमा १४८-१ अनि ३५औं ओभरमा १७२-२ को बलियो अवस्थामा देखिएपनि नेपाली टोलीको ब्याटिङ तत्पश्चात धर्मरायो ।

जर्सीका लागि डानियल बिरेल, बेन्जामिन वार्ड र निक ग्रीनवूडले २-२ विकेट लिँदा जर्ज रिचार्डसन र चार्ल्स पर्चार्डले १-१ विकेट लिए ।

जर्सीसँग बुधबार अर्को एकदिवसीय खेल खेलेपछि नेपालले नेदरल्यान्ड्समा नामिबिया पनि सम्मिलित लिग २ को त्रिदेशीय शृङ्खला खेल्नेछ ।