सुदूरपश्चिम रोयल्सले सार्वजनिक गर्‍यो पहिचान झल्काउने नयाँ ‘अपि एडिसन’ जर्सी

२५ असोज । नेपाल प्रिमियर लिग (एनपीएल) को फ्रेन्चाइज टोली सुदूरपश्चिम रोयल्सले अपि हिमाललाई समर्पित गर्दै नयाँ जर्सी सार्वजनिक गरेको छ। टोलीले जर्सीलाई ‘अपि एडिसन’ नाम दिएको छ ।

सुदूरपश्चिमको प्राकृतिक सौन्दर्य, पर्यटन सम्भावना र जैविक विविधतालाई प्रवर्द्धन गर्ने उद्देश्यले तयार पारिएको जर्सीले अपि हिमाललाई विशेष रूपमा सम्मान गरेको छ । जर्सीको पछाडिको भागमा शुक्लाफाँटा राष्ट्रिय निकुञ्जमा पाइने बंगाल टाइगरको आकृति समावेश गरिएको छ ।

टोलीले ‘अपि एडिसन’ नाममार्फत अपि हिमालको पर्यटन प्रवर्द्धन र यस क्षेत्रको प्राकृतिक पहिचानलाई राष्ट्रिय तथा अन्तर्राष्ट्रिय स्तरमा चिनाउने प्रयास गरेको सार्वजनिक गरेको छ ।

सुदूरपश्चिम रोयल्सका प्रमुख कार्यकारी अधिकृत प्रकाश खड्काले जर्सीमार्फत सुदूरपश्चिमको प्राकृतिक सम्पदा र पर्यटनलाई क्रिकेटसँग जोड्ने प्रयास गरिएको जानकारी गराए ।

‘अपि हिमाल सुदूरपश्चिमको प्राकृतिक पहिचान र गौरवसँग जोडिएको महत्वपूर्ण गन्तव्य हो । हामीले यस जर्सीलाई ‘अपि एडिसन’ नाम दिएर अपि हिमालप्रति सम्मान व्यक्त गर्नुका साथै यसको पर्यटन प्रवर्द्धनमा योगदान गर्ने उद्देश्य राखेका छौं । जर्सीमा शुक्लाफाँटाको बंगाल टाइगर समावेश गर्नुले सुदूरपश्चिमको प्राकृतिक विविधता र सम्पदालाई पनि प्रतिनिधित्व गर्छ। क्रिकेटको माध्यमबाट सुदूरपश्चिमका यस्ता महत्वपूर्ण गन्तव्यलाई देश तथा विदेशमा चिनाउन सकिने हाम्रो विश्वास छ’ खड्काले भने ।

सुदूरपश्चिम रोयल्सले नयाँ जर्सी छिट्टै सर्वसाधारणका लागि बिक्रीमा उपलब्ध गराउने सार्वजनिक गरेको छ । यससँगै समर्थकहरूले ‘अपि एडिसन’ जर्सी खरिद गर्न सक्नेछन् ।